Nesta aplicación móstranse os resultados das enquisas anuais de inserción laboral de egresados de grao e máster da UDC. Estas enquisas anuais realízanse mediante a administración dun cuestionario deseñado a partir dos traballos anteriores do Observatorio Ocupacional, así como das recomendacións da Rede de Observatorios de Emprego das universidades españolas.

Poboación e mostra

En cada enquisa, que adoita realizarse na segunda quincena de xullo, a poboación obxecto de estudo defínese como o total de alumnado egresado de titulacións de grao e máster da Universidade da Coruña no curso anterior. É dicir, a poboación atópase, no momento do estudo, a unha media de 12 meses da data da súa de finalización dos estudos. Con todo, no canto de calcular un tamaño da mostra para este universo, en cada edición do estudo determínase unha mostra obxectivo para cada titulación que, cun nivel de confianza do 95%, permita realizar estimacións a nivel de titulación cunha marxe de erro do 3%. A mostra de cada titulación calcúlase coa fórmula habitual:

n = \frac{N \frac{Z^{2} p (1 - p)}{e^{2}}}{\frac{Z^{2} p (1 - p)}{e^{2}} + N - 1}

Onde N é o total de egresados da titulación durante o curso obxecto de estudo, p=0.5, o valor de Z é o correspondente ao nivel de confianza do 95 % (1.96), e o valor de e o correspondente á marxe de erro do 3 % (0.03).

O número de egresados e/ou de egresados enquisados nalgunhas titulacións é baixo, o que non permite estimacións adecuadas. Ademais, mostras tan reducidas poderían permitir a identificación das persoas a partir das respostas, polo que decidiuse non mostrar datos daquelas titulacións cunha mostra inferior a 10, aínda que os datos destas titulacións si computan nos cálculos globais da UDC.

As poboacións e mostras dos distintos estudos son as seguintes:

Alumnos que egresaron durante o curso 20-21: O universo está composto por 2864 alumnos/as da UDC (2257 de grao e 607 de máster). O sumatorio das mostras de cada titulación xeraba una n obxectivo para o conxunto da UDC de 2706 (2108 de grao e 598 de máster). Tras o traballo de campo, o tamaño da mostra finalmente obtida foi de 2467 (1954 de grao e 513 de máster). Ao se calcularen as mostras co obxectivo de obter representatividade a nivel de titulación, o seu sumatorio xerou una mostra total da UDC moi ampla que, a nivel de confianza do 95 %, nos permite realizar estimacións para o conxunto dos titulados de grao cunha marxe de erro do 0.81 % e para o conxunto da poboación de egresados de máster cunha marxe de erro do 1.7 %.
Alumnos que egresaron durante o curso 21-22: O universo está composto por 1703 alumnos/as da UDC (1143 de grao e 560 de máster). Tras o traballo de campo, o tamaño da mostra finalmente obtida foi de 1415 (947 de grao e 468 de máster). Ao se calcularen as mostras co obxectivo de obter representatividade a nivel de titulación, o seu sumatorio xerou una mostra total da UDC moi ampla que, a nivel de confianza do 95 %, nos permite realizar estimacións para o conxunto dos titulados de grao cunha marxe de erro do 1.3 % e para o conxunto da poboación de egresados de máster cunha marxe de erro do 1.8 %.
Alumnos que egresaron durante o curso 22-23: O universo está composto por 1142 alumnos/as da UDC (684 de grao e 486 de máster). Tras o traballo de campo, o tamaño da mostra finalmente obtida foi de 949 (548 de grao e 401 de máster). Ao se calcularen as mostras co obxectivo de obter representatividade a nivel de titulación, o seu sumatorio xerou una mostra total da UDC moi ampla que, a nivel de confianza do 95 %, nos permite realizar estimacións para o conxunto dos titulados de grao cunha marxe de erro do 1.9 % e para o conxunto da poboación de egresados de máster cunha marxe de erro do 2.1 %.

Traballo de campo

O traballo de campo consiste na realización de entrevistas telefónicas asistidas por computador durante a segunda quincena de xullo de cada ano, e foi realizado pola empresa de estudos de mercado e enquisas IDEARA S.L. O tratamento dos datos de contacto de egresados regulouse mediante un contrato de tratamento de datos persoais entre a UDC e a empresa, de acordo coa normativa vixente.

O protocolo de contactos para a realización da enquisa prevía un mínimo de tres intentos de contacto en horas e días distintos por cada persoa seleccionada de maneira aleatoria, antes de descartar esa persoa de forma definitiva para a súa inclusión na mostra.

Preparación dos datos

No proceso de preparación dos datos para a súa análise tomáronse as seguintes decisións:

A partir do estudo correspondente á cohorte que finalizou estudos no curso 21-22, decidiuse dar un tratamento especial aos egresados do Grao en Náutica e Transporte Marítimo e do Grado en Tecnoloxías Mariñas. Algúns egresados destas titulacións saen ao mercado de traballo tras o seu grao, mentres outros pospoñen esa saída á obtención dun título profesionalizante tras a realización dunhas prácticas de alumno embarcado. Considerando esta particularidade, decidiuse facer unha enquisa a quen no curso 21-22 acabaran o grao e decidiran non realizar prácticas de alumno embarcado e a aqueles que, decidindo facelas, obtiveron o título profesionalizante durante o curso 21-22. Tamén en consideración coas particularidades dos egresados destes dous graos, decidiuse dar un tratamento especial á súa clasificación laboral. A atención ao feito frecuente de que moitos egresados traballan para a mesma empresa en períodos intermitentes, contabilizouse aos que estaban nesta situación como “ocupados”.
Aínda que son poucos casos, hai algúns alumnos que finalizaron estudos de grao e de máster durante o mesmo curso. Estes casos computan na análise como egresados do título superior.